نسرين طافش تكتب عن الحب بواقعية شاعرية...

جي بي سي نيوز-: عبّرت النجمة العربية عن رأيها في الحب بكثير من الخصوصية الشاعرية والعفوية، فكتبت نظرتها حول هذا الشعور وإشكالياته في مكاشفة حقيقية مع جمهورها.

ونشرت نسرين صورة الفنانين الراحلين فاتن حمامة وعمر الشريف عبر حسابها على تطبيق "انستغرام" وكتبت ما يلي:

الحب بالنسبة لي .. يتنافى مع المشقة و العذاب .. مهما كتب الشعراء بانو حلاوتو بعذابو و غنى من غنى عن لوعة الحب .. برأي هذا أبعد ما يكون عن الحب الحقيقي و أقرب ما يكون اما للأنانية أو جلد الذات .. و بكلا الحالتين يا إما في مشكلة بالمصدر أو المتلقي أو كليهما معا ..

الحب .. إن لم يحمل الإنسجام و السعادة و البهجة .. السكينة و تقبل الآخر كما هو .. فهو خيبة قادمة متنكرة على هيئة حب ..

عذرا نزار قباني مع عشقي لقصائدك .. لكن الحب ليس الإبحار دون سفينة و شعورنا ان الوصول محال .. الحب هو السفينة و البحر .. و السعادة هية الطريق و ليس وجهة الوصول الممكنة ...

الحب هو أنو يجنو اللي بيحبو مع بعض .. مش يجنو على بعض ..
إنو يكتشفو الدنيا سوا .. مو يكتشفو عيوب كل واحد للتاني و يحطا تحت المجهر و يقولو مصدومين انا كيف حبيت هيك شخص !

الحب هو ضحكة قلب رايق و صوت بيصير أدفى لما منحكي مع اللي منحبو .. الحب التزام إرادي في حضرة التناغم و التفاهم اللي مش بالضروري يكون تام لأن الكمال لله .. الحب هو انو تختار و تقرر بوقت المشاكل انك تكون لطيف على انك تثبت انك على صواب و الشريك مخطأ .. الحب هو اللاخوف .. الحب اتفاق واعي بين القلب و الروح و العقل ..

للأسف مفاهيم مؤذية و مدمرة كتيرة تبنيناها بحياتنا بدون وعي و تفكير .. من خلال قصيدة عن الحزن في العشق او أغنية عن وجع الغرام أو من رواية حب فاشل بتطرح وجهة نظر بتحكي عن تجربة فردية لأصحابها .. مو بالضرورة تنطبق علينا ..

قولوا عني إنو عقلي دقة قديمة .. لكني لسا مؤمنة بالحب الحقيقي .. اللي مو بالضرورة يكون مثالي .. و لا متل الافلام .. لإني لا أؤمن إنو في شيئ مثالي أصلا .. لكن يكفي انو يكون ببساطة حقيقي .. المفاهيم المغلوطة عن الحب خوفت الناس منو و حولتو لجحيم .. مع إنو الحب هو نعيم الحياة .. و جنة الدنيا .. و على قولة القائل .. الحب متل فنجان شاي سخن بعز البرد .. لا تستعجل بشربو بتحرق لسانك و لا تتركو وقت طويل بيبرد ..